У Польшчы завяршыліся манэўры Dragon-17
PR dla Zagranicy
Jury Lichtarowicz
01.10.2017 17:01
Міністэрства абароны пазытыўна ацаніла вучэньні ды стан польскай арміі.
Foto: PAP/Bartłomiej Zborowski
На мінулым тыдні ў Польшчы прайшлі найбуйнейшыя вучэньні ў гэтым годзе. У манэўрах Dragon-17 узялі ўдзел 17 тысяч жаўнераў ды 3,5 тысячы адзінак ваеннай тэхнікі й ўзбраеньня з Польшчы ды 11 іншых краін: ЗША, Летувы, Латвіі, Вялікабрытаніі, Германіі, Славаччыны, Італіі, Баўгарыі, Румыніі й Грузіі ды Украіны.
Міністар абароны Польшчы Антоні Мацярэвіч падвёў вынікі манэўрам і даў ім станоўчую ацэнку. Гэта былі вельмі добрыя вучэньні, вельмі эфэктыўна рэалізаваныя, – сказаў Мацярэвіч.
Міністар абароны падкрэсьліў, што вучэньні Dragon-17 зьяўляюцца адпраўной кропкай для заплянаваных на будучы год камандна-штабных манэўраў Зіма-18.
Манэўры Зіма-18 будуць мець кібэрнэтычны характар, падчас якіх будзе мадэлявацца рэальны ход падзей, праводзіцца праверка зброі ды тактычнага разьмяшчэньня войскаў, неабходнага, каб спыніць расейскую агрэсію.
ПР/юл