Беларускія філятэлісты перамаглі на конкурсе ў Польшчы
PR dla Zagranicy
Alaksandar Papko
15.01.2018 13:33
Зьбіральнікі паштовых марак з Горадні ўзялі залаты й пазалочаны мэдаль.
pixabay.com/Public Domain/CC0
Беларускія зьбіральнікі паштовых марак атрымалі ўзнагароды на экспэрымэнтальнай выставе ў польскім горадзе Чэнстахова – паведамляе Беларускае радыё «Рацыя». На выставе агулам было прадстаўлена амаль тры дзесяткі калекцыяў з усёй Польшчы, а таксама два беларускія зборы.
Як журналістам паведаміў кіраўнік гарадзенскай абласной арганізацыі філятэлістаў Фрыдэрык Гушча, беларускія калекцыянэры дасягнулі значных посьпехаў. Яны атрымалі залаты й пазалочаны мэдаль. Найвышэйшую узнагароду атрымаў Андрэй Грыбаў з калекцыяй «На скрыжаваньні гісторыі», а пазалочаны мэдаль узяў сам Фрыдэрык Гушча з калекцыяй «Правізорыі Гарадзеншчыны 1992-1993 год».
Гарадзенская суполка зьбіральнікаў паштовых марак лічыцца адной з самых моцных у Беларусі, і яе сябры прымаюць удзел у выставах ня толькі ў Польшчы, але таксама ва Украіне, Расеі ды іншых дзяржавах.
racyja.com/ап