Полька ў коме нарадзіла здаровае дзіця

Спэцыялісты з Інстытуту здароўя маці полькі ў Лодзі правялі кесарава сячэньне ў жанчыны, якая з кастрычніка знаходзіцца ў коме. Дзяўчынка нарадзілася здаровай.

24-гадовая Віялета Шылейка з кастрычніка не прыйшла ў прытомнасьць пасьля аўтамабільнай аварыі, падчас якой у яе быў пашкоджаны мозг. Жанчына была на трэцім месяцы цяжарнасьці. Лодзкія лекары ня верылі, што ім удасца выратаваць дзіця. Усё ж было прынятае рашэньне захаваць цяжарнасьць і на 28 тыдні было зробленае кесарава сячэньне.

«Будучы ў коме, стала знаходзячыся на аддзеле інтэнсыўнай тэрапіі, пацыентка дачакалася да 6 месяца цяжарнасьці і нарадзіла праз кесарава сячэньне неданошаную дачку, вагай 850 грам. Раней былі праведзеныя дзьве апэрацыі мозгу», – так пра жыцьцё дачкі і ўнучкі напісала на фэйсбуку маці Віялеты Шылейкі.

На працягу трох месяцаў дзяўчынка знаходзілася ў шпіталі. Пасьля трапіла пад апеку да таты і бабулі. «Мы гаворым пра цуд, паколькі ўсё магло закончыцца вельмі хутка. Дзіця магло загінуць адразу пасьля аварыі, паколькі маці праходзіла вельмі складаныя нейрахірургічныя апэрацыі», – адзначаюць лекары з лодзкага шпіталя.

Маці дзяўчынкі цяпер знаходзіцца ў цэнтры для людзей, якіх выводзяць з комы.

ав