Палякі - эўраэнтузіясты

70% палякаў станоўча ацэньвае сяброўства Польшчы ў Эўрапейскім Зьвязе. Пра гэта сьведчаць вынікі дасьледаваньня „Эўрабаромэтра” – статыстычнага ўпраўленьня Эўразьвязу. Падтрымка для Эўразьвязу ў Польшчы перавышае сярэднюю па ЭЗ.

Апытаньне было праведзенае ў красавіку. У ім удзельнічалі каля 27 тысяч рэспандэнтаў з краін Эўразьвязу.

Толькі 5% апытаных палякаў ацаніла сяброўства краіны ў ЭЗ адмоўна. У сярэднім па супольнасьці інтэграцыяй незадаволеныя 12% апытаных. Ажно 57% палякаў лічаць, што голас Польшчы мае значэньне ў супольнасьці. Гэта на 10% больш, чым складае сярэдняя па ЭЗ.

Апытаныя палякі, падобным чынам як жыхары астатніх краінаў ЭЗ, найбольш важнай справай лічаць барацьбу з тэрарызмам. На чарговых месцах яны называюць эканоміку й палітыку бясьпекі.

У сваю чаргу астатнія члены супольнасьці зьвяртаюць увагу на барацьбу зь беспрацоўем сярод моладзі.

аз