Расейскія самалёты часьцей парушаюць паветраную прастору Балгарыі
PR dla Zagranicy
Anna Zadrożna
25.07.2016 11:25
Кіраўнік балгарскага міністэрства абароны лічыць, што гэта правакацыя супраць Балгарыі.
Цяжкі зьнішчальнік Су-27 ВПС Расеі. Ілюстрацыйны здымакwww.flickr.com/IRONHIDE
Кіраўнік Міністэрства абароны Балгарыі Мікалай Ненчаў паведаміў пра павелічэньне колькасьці парушэньняў паветранай прасторы Балгарыі расейскімі ваеннымі й грамадзянскімі самалётамі. Паводле балгарскага міністра, гэта правакацыя супраць Балгарый і ваенна-паветраных сілаў краіны.
Ненчаў сказаў, што цягам апошняга месяца расейскія ваенныя самалёты чатыры разы парушалі „балгарскую зону адказнасьці” ў паветранай прасторы NATO. Апрача таго, паводле міністра, расейскія самалёты пры ўваходзе ў паветраную прастору Балгарыі выключаюць транспондары, то бок, прылады, якія спрашчаюць выяўленьне й ідэнтыфікацыю самалёта й выкарыстоўваюцца ў сыстэмах кіраваньня паветраным рухам.
„Гэта нас вельмі непакоіць”, - сказаў Ненчаў. Ён дадаў, што любое парушэньне паветранай прасторы заканчваецца адпаведнай рэакцыяй балгарскіх зьнішчальнікаў, то бок абыходзіцца краіне вельмі дорага.
Па гэтай справе ўлады Балгарыі чакаюць ад Расеі тлумачэньняў.
Кіраўнік Міністэрства абароны Балгарыі дадаў, што ў мінулым месяцы таксама расейскія пасажырскія самалёты парушылі паветраную прастору Балгарыі ажно шэсьць разоў.
аз