У сталіцы Лібіі – сур’ёзныя сутыкненьні
PR dla Zagranicy
Alaksandar Papko
27.05.2017 14:16
Успыхнулі перастрэлкі паміж групоўкамі, якія ўваходзяць ва Ўрад нацыянальнага адзінства.
pixabay.com
У пятніцу ў сталіцы Лібіі Трыпалі пачаліся баі паміж урадавымі сіламі ды ісламскімі паўстанцамі. Загінулі ня менш за 28 чалавек, больш за 120 былі параненыя.
Перастрэлкі ўспыхнулі раніцай у пятніцу. Міжнародна прызнаны Ўрад нацыянальнага адзінства пачаў наступ на баевікоў з мэтай не дазволіць ім узяць пад кантроль сталіцу Лібіі.
Урад нацыянальнага адзінства быў створаны ў сакавіку 2016 году. Аднак кантралюе ён толькі частку тэрыторыі Лібіі, у большай частцы краіны працягваецца грамадзянская вайна.
Сам Урад нацыянальнага адзінства таксама застаецца нетрывалым. Ён узьнік у выніку пагадненьня, заключанага пры пасярэдніцтве ААН паміж умеркаванымі сіламі, прызнанымі міжнароднай супольнасьцю, ды ісламістамі, якія кантралявалі сталіцу Лібіі. Менавіта паміж праісламскімі і ўмеранымі групоўкамі ўнутры лібійскага ўраду адбыліся сутыкненьні ў Трыпалі.
IAR/ап