Дональд Трамп заклікаў да ізаляцыі Паўночнай Карэі

Дональд Трамп заклікаў міжнародную супольнасьць ізаляваць улады ў Пхеньяне й пахваліў Гішпанію за высылку з краіны амбасадара Паўночнай Карэі.

Падчас сумеснай прэс-канфэрэнцыі зь гішпанскім прэм'ер-міністрам Мар’яна Рахоем Дональд Трамп заявіў, што карэйская ядзерная й ракетная праграма ўяўляе небясьпеку для ўсяго сьвету.

„Надышоў час, каб усе адказныя краіны аб'ядналі свае намаганьні з мэтай ізаляцыі Паўночнай Карэі”, - сказаў амэрыканскі прэзыдэнт.

Дональд Трамп таксама раскрытыкаваў кіраўніка Паўночнай Карэі Кім Чэн Ына за яго правакацыйныя заявы й дзеяньні. Прэзыдэнт ЗША дадаў, што лепш было б вырашыць гэтыя праблемы па дыпляматычных каналах, але ён гатовы таксама да ваенных дзеяньняў.

„Калі мы будзем прымушаны выкарыстаць такі спосаб дзеяньня, то ён прывядзе да зьнішчэньня Паўночнай Карэі”, - прыгразіў Дональд Трамп.

Амэрыканскі прэзыдэнт дадаў, што яго жорсткая рыторыка ў дачыненьні да Паўночнай Карэі зьяўляецца рэакцыяй на заявы прадстаўнікоў уладаў у Пхеньяне.

аз