Сваякі пасажыраў зьбітага «Боінгу» выйгралі суд

Сваякі ахвяраў катастрофы «Боінгу» зьбітага прарасейскімі сэпаратыстамі над Данбасам, выйгралі справу супраць лідара баевікоў Ігара Гіркіна. Гэта дае ім права на кампэнсацыю ў сотні мільёнаў даляраў – паведамляе ўкраінскае выданьне «Эўрапейская праўда» са спасылкай на галяндзкую тэлепраграму ZEMBLA.

Пазоў быў пададзены сем’ямі 25 ахвяраў катастрофы, 10 зь якіх зьяўляюцца грамадзянамі Нідэрляндаў. Амэрыканскі судзьдзя вынес вэрдыкт 21 сьнежня. Суд пастанавіў, што агульная кампэнсацыя родным ахвяраў павінна складаць амаль 400 мільёнаў даляраў – па 20 мільёнаў даляраў кожнаму.

Аднак у паведамленьні гаворыцца, што шанцы атрымаць кампэнсацыю раўняюцца нулю, паколькі сам Гіркін у суд не зьявіўся, а па яго адрасе ў Маскве нікога не знайшлі. Адвакаты сямей пацярпелых намераныя арыштаваць маёмасьць Гіркіна. Аднак і яе будзе недастаткова, каб выплаціць шматмільённыя кампэнсацыі.

«Гаворка ідзе не пра грошы, а пра аднаўленьне справядлівасьці для сем’яў. Мы хочам прыцягнуць сусьветную ўвагу да гэтай справы і да тых, хто справакаваў гэтую страшную трагедыю», – заявіў адвакат сваякоў ахвяраў катастрофы Флойд Вінсэр.

«Боінг-777» авіякампаніі Malaysia Airlines быў зьбіты над Данбасам 17 ліпеня 2014 году. Ракета была выпушчаная з комплексу «Бук», прывезенага з Расеі. У выніку катастрофы загінулі 298 чалавек.

eurointegration.com.ua/ап