У ЗША разьвітваюцца з Джонам Маккейнам

Пахаваньне Джона Маккейна праходзіць 2 верасьня. Сьцягі ўрадавых будынкаў у Вашынгтоне, уключаючы Кангрэс і Белы дом, апушчаны да паловы мачты.

31 жніўня пад купалам Капітолія амэрыканцы маглі аддаць апошнюю даніну павагі памерламу. 1 верасьня ў Нацыянальным саборы ў Вашынгтоне прайшла галоўная мэмарыяльная служба з удзелам сям'і, сяброў і членаў Кангрэса ЗША, а таксама амэрыканскіх і замежных высокапастаўленых асоб.

Польскія ўлады на разьвітальных цырымоніях прадстаўлены кіраўніком канцылярыі прэзыдэнта Кшыштафам Шчэрскім і сэнатарам Аннай Марыяй Андэрс.

Маккейна хаваюць на могілках Ваенна-марской акадэміі ў Аннаполiсе, у штаце Мэрылэнд.

Амэрыканскі сэнатар Джон Маккейн (John McCain) памёр 25 жніўня на 82-м годзе жыцьця ў сваім доме ў штаце Арызона. З 2017 года Маккейн пакутаваў ад агрэсіўнай формы раку галаўнога мозга.

Маккейн на працягу апошніх гадоў рэзка крытыкаваў палітыку Аляксандра Лукашэнкі і падтрымліваў дэмакратычныя перамены ў Беларусі. Маккейн таксама падтрымліваў палітыку Польшчы і Ўкраіны накіраваную на стрымліваньне расейскай агрэсіі ва Ўсходняй Эўропе.

IAR/вк