У Варшаву прыехаў брытанскі дэпутат, паляк па паходжаньні Даніэль Каўчыньскі. Ягоная мэта – паспрабаваць пераканаць польскіх палітыкаў пайсьці сьледам за Вялікабрытаніяй ды выйсьці з ЭЗ.
У размове з Польскім радыё ён падзяліўся сваімі аргумэнтамі на карысьць дадзенай ідэі. Маўляў, ЭЗ умешваецца ў польскія ўнутраныя справы, а неўзабаве будзе браць з польскага бюджэту больш, чым Польшча атрымлівае з Брусэля.
Ці вы - першы брытанскі дэпутат польскага паходжаньня?
Даніэль Каўчыньскі: Так. Мая сям’я зьехала з Польшчы ў 1978. Гэта было не маё рашэньне, а маіх бацькоў, якія мелі моцна антыкамуністычныя погляды. Пазьней з-за вайсковага становішча мы не маглі вярнуцца. Я пайшоў у ангельскую школу, але сачыў за тым, што адбываецца ў Польшчы. Частка маёй сям’і засталася тут, таму я не губляў кантакты. Мы зьбіралі рэчы, прысылалі сюды, мы дапамагалі Польшчы й палякам.
Як вы ахарактарызуеце польска-брытанскія адносіны?
Даніэль Каўчыньскі: Гэта прыязныя адносіны. Мы без ваганьняў выканаем наш абавязак па падтрымцы палякаў. Любая атака на Польшчу, любога характару, і наш парлямэнт ніколі не згодзіцца закрыць на гэта вочы: будзем поўная падтрымка Польшчы, у тым ліку ў рамках NATO. Хоць мя цяпер і выходзім з ЭЗ, але ў рамках трансатлянтычнай абарончай структуры мы застаёмся плячом к плячу з палякамі.
З чым вы прыехалі ў Польшчу?
Даніэль Каўчыньскі: Я прыехаў абмеркаваць вельмі важную тэму для мяне. Я размаўляў з палітыкамі з партыі “Права й справядлівасьць” ды руху “Кукіз’15”. Мы абмяркоўвалі Брэксіт. Чаму мы галасавалі за выхад з ЭЗ, чаму наша краіна палічыла для сябе непэрспэктыўным быць чальцом дадзенага палітычнага зьвязу? Я адказваў на гэтыя пытаньні. У Польшчы таксама ёсьць эўраскептыкі, прыхільнікі выхаду з ЭЗ, хаця большасьць грамадзтва пакуль настаўленая на тое, каб застацца ў Эўразьвязе. Я разумею гэта, але варта таксама пачаць дыскусію пра тое, што ляжыць у польскім інтарэсе.
Якія, на вашу думку, тут інтарэсы ў Польшчы?
Даніэль Каўчыньскі: Неўзабаве Польшча стане плацельшчыкам, а не атрымальнікам эўрапейскіх сродкаў. Больш за тое, ЭЗ ужо актыўна ўмешваецца ва ўнутраныя справы Польшчы. Гучны прыклад – Канстытуцыйны суд. Таксама ЭЗ навязвае колькасьць уцекачоў, якіх Польшча павінна прыняць. А галоўная прычына таго, чаму мы выйшлі з ЭЗ, гэта тое, што мы былі стомленыя пастаянным умяшальніцтвам у справы нашай сувэрэннай нацыі з боку неабраных ды некантраляваных бюракратаў з Брусэля. Людзі патрабуюць, каб улада мела адказнасьць і была да іх блізкай, а не аддалялася. Вы можаце дабіцца празрыстасьці ды адказнасьці з боку палітыкаў толькі тады, калі яны будуць блізка да людзей, а не наадварот.
Брытанскі дэпутат запрасіў польскіх калег наведаць брытанскі парлямэнт. Ён заклікае пачаць дыскусію над стратэгічным інтарэсам Польшчы і над тым, ці чалецтва ў ЭЗ трапляе ў сьпіс гэтых прыярытэтаў.
Падрыхтаваў Юры Ліхтаровіч
Размаўляў Міхал Аўчарэк