Logo Polskiego Radia
Print

Падручнік для ксяндзоў аб тым, як адгаворваць ад суіцыду

PR dla Zagranicy
Jolanta Śmiałowska 06.12.2016 15:15
Колькасьць спробаў самагубства ў Польшчы за год складае 60 тысяч.
Bild: flickr.com/Roman Catholic Archdioce

Дыяцэзія ў Плоцку выдала кніжку для ксяндзоў, як пазнаць асобу, якая намераная зьдзейсьніць самагубства, і якім чынам ёй дапамагчы.

У Польшчы кожны год 6 тысяч чалавек зьдзяйсьняе суіцыд, 2 тысячы спрабуе гэта зрабіць, – паведамляюць паліцэйскія статыстычныя дадзеныя. Аднак фактычна колькасьць людзей, якія хочуць пазбавіць сябе жыцьця, яшчэ большая.

Крыміноляг і спэцыяліст па пытаньні суіцыдаў прафэсар Бруна Голыст мяркуе, што колькасьць спробаў самагубства ў Польшчы за год складае 60 тысяч.

Да прафэсара зьвярнуўся біскуп Плоцкай рыма-каталіцкай дыяцэзіі Пётр Лібэра й такім чынам паўстаў падручнік «Афірмацыя жыцьця».

- Я лічу, што ксяндзы могуць выдатна паўплываць на зьмяншэньне колькасьці суіцыдаў і іх адмоўных сацыяльных і рэлігійных наступстваў, – кажа прафэсар Голыст. А ксёндз Збігнеў Сабалеўскі, які напісаў некалькі кніжак для ксяндзоў адносна споведзі, дадае: для многіх людзей, якія згубілі сэнс жыцьця, адзінае, што іх стрымлівае ад зьдзяйсьненьня суіцыду, зьяўляюцца рэлігійныя матывы. Яны шукаюць дапамогі ў споведнікаў, пры чым рэдка зьвяртаюцца да спэцыялістаў, – тлумачыць ксёндз Сабалеўскі. Справа ў тым, каб душпастыр умеў распазнаць асоб, якія часта высылаюць сыгналы з просьбай аб дапамозе, але ня кажуць пра яе наўпрост. У далікатнай гутарцы ксёндз павінен угаварыць гэтага чалавека, каб ён скарыстаўся дапамогай спэцыялістаў.

Біскуп Лібэра імкнецца зацікавіць падручнікам ксяндзоў па ўсёй Польшчы.

Rzeczpospolita/яс

Print
Copyright © Polskie Radio S.A Пра нас Кантакт