Logo Polskiego Radia
Print

«Крэмль будзе блякаваць любое збліжэньне Менска з Захадам»

PR dla Zagranicy
Alaksandar Papko 14.02.2018 17:23
  • Крэмль будзе блякаваць любое збліжэньне Менска з Захадам.mp3
Амэрыканскія спэцслужбы апублікавалі даклад пра глябальныя пагрозы міру, дзе важнае месца адведзена Беларусі.
Галоўная старонка дакладу Worldwide Threat Assessment, падрыхтаванага амэрыканскімі спецслужбамі. Галоўная старонка дакладу Worldwide Threat Assessment, падрыхтаванага амэрыканскімі спецслужбамі. dni.gov

Крэмль «будзе старацца сапсаваць любыя спробы збліжэньня паміж Менскам і Захадам», – заяўляюць аналітыкі амэрыканскіх спэцслужбаў. У панядзелак група амэрыканскіх выведвальных агенцтваў апублікавала даклад аб пагрозах канфліктаў у розных частках сьвету. Узгадваецца ў ім і Беларусь. Ці цьвяроза Злучаныя Штаты ацэньваюць сытуацыю ў Беларусі? Сваімі меркаваньнямі дзеляцца беларускія палітолягі.

«Расея ўспрымае Беларусь як стратэгічны буфэр паміж сабой і NATO, і таму будзе старацца сапсаваць любыя спробы збліжэньня паміж Менскам і Захадам. Кіраўнік Беларусі Аляксандар Лукашэнка будзе працягваць цеснае супрацоўніцтва з Масквой у справах бясьпекі, але пры гэтым будзе старацца нармалізаваць адносіны з Захадам, каб знайсьці супрацьвагу ўплывам Расеі».

Такімі словамі сытуацыю ў Беларусі акрэсьлівае даклад «Ацэнка міжнародных пагрозаў» (Worldwide Threat Assessment). Дакумэнт быў падрыхтаваны United States Intelligence Community – фэдэрацыяй з 16 дзяржаўных структураў, якія займаюцца выведвальнай дзейнасьцю. На 28 старонках дакладу апісаныя галоўныя глябальныя пагрозы, такія як распаўсюджаньне зброі масавага зьнішчэньня ці тэрарызм, краіны й сілы, якія дэстабілізуюць сытуацыю на сьвеце, а таксама краіны, важныя з пункту гледжаньня рэгіянальнай бясьпекі.

Амэрыканскія аналітыкі пералічылі Беларусь у шэрагу краінаў, сытуацыя ў якіх уплывае на мір ва Ўсходняй Эўропе. Ацэнка адносінаў Менска з Масквой карэктная, але даволі банальная – мяркуюць беларускія палітолягі. Дырэктар Цэнтра палітычнага аналізу й прагнозу Павал Усаў, мяркуе, што заходнія экспэрты перабольшваюць самастойнасьць Менска.

Павал Усаў: Зьнешняя палітыка Менска знаходзіцца пад велізарным уплывам Расеі. Нягледзячы на тое, што Лукашэнка імкнецца распачаць дыялёг з Захадам, і робіць гэта пасьпяхова, ён ня можа рабіць радыкальных крокаў у адносінах з заходнімі краінамі. На важных галасаваньнях па пытаньнях міжнароднай бясьпекі ў Парлямэнцкай асамблеі АБСЭ ці ў ААН Менск заўсёды падтрымлівае пазыцыю Масквы.

Якія дзеяньні Расея можа прымаць, каб сапсаваць адносіны Менска з Захадам, і ці былі мы ўжо сьведкамі такіх дзеяньняў? Так, былі – нагадвае Павал Усаў. Калі беларускія ўлады палепшылі адносіны з Кіевам, а затым адчынілі межы для заходніх турыстаў, Расейскія ўлады зачынілі расейска-беларускую мяжу для праезду грамадзянаў трэціх краінаў.

Аднак закрыцьцё мяжы – гэта першы і далёка ня самы моцны інструмэнт, пры дапамозе якога Расея можа адахвоціць Беларусь «сябраваць» з Захадам – кажа палітоляг Валер Карбалевіч. Масква можа павысіць цэны энэрганосьбітаў, зачыніць расейскі рынак для беларускіх тавараў, спыніць падтрымку Менска на міжнароднай арэне, а таксама паспрабаваць пры дапамозе расейскіх тэлеканалаў зьнішчыць грамадзкую падтрымку Лукашэнкі. Аднак пакуль гэтыя інструмэнты Крэмль не выкарыстоўвае, бо Лукашэнка не пераходзіць «чырвоных лініяў» – тлумачыць Валер Карбалевіч. Якія ж гэта лініі?

Валер Карбалевіч: Гэта знаходжаньне Беларусі ў інтэграцыйных аб’яднаньнях, створаных Расеяй. Гэта Саюзная дзяржава, гэта СНД, гэта Эўразійскі эканамічны зьвяз, а таксама АДКБ.

Канфлікт Расеі з Украінай пачаўся менавіта пасьля таго, як Кіеў вырашыў не ўступаць у Мытны зьвяз з Масквой, а замест гэтага падпісаць Дамову аб асацыяцыі з Эўразьвязам – нагадвае Валер Карбалевіч. Менск не зьбіраецца спыняць свой удзел у створаных Расеяй інтэграцыйных аб’яднаньнях, так што сур’ёзных падставаў непакоіцца ў Крамля пакуль няма – зазначае аналітык.

Спэцслужбы ЗША лічаць, што эканамічная стагнацыя ў Расеі не перашкодзіць ёй падтрымліваць канфлікты ў Сірыі і Украіне. На іх думку, напружанасьць у Данбасе ў бліжэйшы год будзе захоўвацца на ранейшым узроўні. Асноўнай жа пагрозай для Ўкраіны стануць палітычныя канфлікты, якія Масква можа выкарыстаць для сваіх мэтаў.

«У 2018 годзе Расея будзе працягваць мадэрнізаваць, разьвіваць і разьмяшчаць шырокі спэктар ядзернай, звычайнай і асымэтрычнай зброі, каб скараціць сваё адставаньне ад Злучаных Штатаў у вайсковай галіне», – прагназуюць аўтары дакладу «Ацэнка міжнародных пагрозаў».

Аднак, на думку амэрыканскіх аналітыкаў, Эўропа не адносіцца да рэгіёнаў з найвышэйшай рызыкай выбуху новай вайны. Яны лічаць, што ў 2018 годзе ўзброеныя канфлікты могуць успыхнуць на Карэйскай паўвысьпе, а таксама на Блізкім Усходзе – праміж саюзьнікамі Ірану ды Саудаўскай Аравіі.

Аляксандар Папко

Print
Copyright © Polskie Radio S.A Пра нас Кантакт