Варшава закупіць 213 новых трамваяў

Варшава аб’явіла вынікі тэндэру на пакупку 213 новых трамваяў, паведамляе Gazeta Wyborcza. Конкурс, аб’яўлены варшаўскай мэрыяй, выйграла кампанія Hyundai Rotem Company. Польская сталіца на рэалізацыю кантракту прызначыла 2 млрд 320 млн злотых (1 эўра = 4 злотыя 32 грошы паводле курсы Нацбанку Польшчы з 12 лютага). Але карэйская кампанія запрапанавала меншую цану – 1 млрд 820 млн злотых.

Многія аглядальнікі й экспэрты задавалі пытаньне, чаму тэндэр выйграла ня польская, а замежная кампанія? Перамога айчыннай фірмы азначала б падтрымку польскай прамысловасьці. У згаданым кантэксьце згадвалася кампанія PESA, якая вядомая ў Польшчы й далёка за яе межамі сваёй прадукцыяй.

Нагадаем, Pesa – польская кампанія, якая спэцыялізуецца ў вытворчасьці цягнікоў, лякаматываў, вагонаў, трамваяў і ў іх мадэрнізацыі. Галаўны офіс і асноўная вытворчасьць разьмяшчаецца ў горадзе Быдгашч (цэнтральная Польшча). Гісторыя фірмы сягае 1851 году.

Pesa Bydgoszcz – адна з буйнейшых кампаній па выпуску рэйкавага транспарту ў Эўропе.

Але аказалася, што справа выглядае ня так і проста. PESA таксама падала заяўку на тэндэр, але яе цанавая прапанова складала 2 млрд 830 млн злотых – амаль на 500 млн злотых больш за ліміт сумы, вызначанай варшаўскай мэрыяй. Улады сталіцы паведамляюць, што ліміт кантракту быў вядомы фірмам, якія прымалі ўдзел у тэндэры, таму высоўваючы сваю цану PESA разумела, што яго перавышае. Пры гэтым мэрыя зазначае, што ў апошнія гады польская сталіца купіла 281 трамвай вытворчасьці фірмы PESA – такой колькасьці трамваяў кампаніі з Быдгашчы няма ані ў адным горадзе Эўропы.

Новыя трамваі фірмы Hyundai, якія пачнуць прыбываць у Варшаву ў канцы 2022 году, будуць двух тыпаў – па 24 і 33 мэтры даўжыні, паведамляе Gazeta Wyborcza.

вс