У Варшаве заканчваецца сёлетні XVІІ Міжнародны конкурс піяністаў імя Фрыдэрыка Шапэна. У чацьвер і пятніцу ў Нацыянальнай філярмоніі можна будзе паслухаць апошніх канцэртаў ляўрэатаў прэстыжнага спаборніцтва музыкантаў з усяго сьвету.
У сераду ўвечары ў Нацыянальнай філярмоніі ў Варшаве прайшла цырымонія ўзнагароджаньня пераможцаў XVІІ Міжнароднага конкурсу піяністаў імя Фрыдэрыка Шапэна.
Залаты мэдаль і галоўную прэмію конкурсу атрымаў Сэнг Чжын Чо з Паўднёвай Карэі. Узнагароду ўручыў прэзыдэнт Польшчы.
Падчас цырымоніі ў Нацыянальнай філярмоніі Анджэй Дуда падзякаваў усім выканаўцам за эмоцыі, якія яны далі публіцы на працягу ўсяго мерапрыемства.
Кіраўнік польскай дзяржавы падкрэсьліў, што апрача прэзэнтацыі сваіх здольнасьцяў, праз музыку Шапэна піяністы прасоўваць таксама польскую дзяржаву.
Анджэй Дуда: У кожнай ноце, якую яны так прыгожа выконваюць, можна ўбачыць адлюстраваньне Польшчы, яе традыцыі й культуры. Такім чынам, кожны музыкант, які іграе Шапэна, прасоўвае Польшчу. І менавіта за гэта я хачу ім шчыра падзякаваць. Іх працай і майстэрствам Польшча вельмі ганарыцца. І за гэта мы ім вельмі ўдзячныя.
Пераможца конкурсу карэйскі піяніст Сэнг Чжын Чо не скрываў, што падчас выступаў у Варшаве ён быў ахоплены вялікімі эмоцыямі.
Сэнг Чжын Чо: Вядома, што я гэта ўспрымаю вельмі эмацыйна. Я вельмі хваляваўся падчас слуханьняў. Адначасова я быў таксама вельмі шчасьлівым, што мог іграць Шапэна ў Варшаве перад польскай публікай. Гэта быў для мяне цудоўны момант. Вялікі дзякуй!
Другое месца атрымаў Шарль Рышар-Амлэн з Канады, ляўрэаткай трэцяй узнагароды стала Кэйт Лю са Злучаных Штатаў Амэрыкі. Чацьвёртую ўзнагароду атрымаў Эрык Лю з ЗША, пятую Тоні Янг з Канады, а шостую Дзьмітрый Шышкін з Расеі. Дыплёмы атрымалі Алёша Юніч з Харватыі, Аімі Кабаяшы зь Японіі, Георгійс Асокінс з Латвіі й паляк Шыман Нэрынг.
Усе слуханьні ў рамках конкурсу Шапэна трансьляваліся ў прамым эфіры Другой праграмы грамадзкага Польскага радыё. Акрамя таго, адмыслова з нагоды конкурсу піяністаў Польскае радыё запусьціла новы лічбавы канал „Радыё Шапэн”.
Радыё ўручыла таксама сваю ўзнагароды - за найлепш выкананую мазурку. Прэмію атрымала амэрыканка Кейт Лю.
Падчас урачыстага гала-канцэрту прыз уручыў старшыня грамадзкага Польскага радыё Анджэй Сезянеўскі.
Анджэй Сезянеўскі: Выкананьне мазуркаў патрабуе найбольшага майстэрства, паколькі гэта адны з найбольш складаных формаў у творчасьці Шапэна. Цяпер да групы іхных выдатных выканаўцаў далучыла Кейт Лю, якой я ўручаю гэтую ўзнагароду зь вялікай радасьцю.
Канцэрты ляўрэатаў, якія адбудуцца ў чацьвер і пятніцу, завершаць прэстыжнае спаборніцтва піяністаў, якое працягвалася тры тыдні. Старшыня журы конкурсу, прафэсар Катажына Папова-Зыдрань падкрэсьліла, што гэта быў выключны час.
Катажына Папова-Зыдрань: Музыка аб’ядноўвае людзей, нягледзячы на геаграфічныя межы, мову й нацыянальнасьць. Мільёны людзей сачылі за гэтым конкурсам, уключаліся ў яго, размаўлялі пра яго. За ўсё гэта мы павінны быць удзячныя Шапэну.
Адным з апошніх пункткаў конкурсу былo ўручэньне яго ўдзельнікам спэцыяльных прызоў, у тым ліку ўзнагароду публікі, якую атрымаў паляк - Шыман Нэрынг.
XVІІ Міжнародны конкурс піяністаў імя Фрыдэрыка Шапэна пачаўся 1 кастрычніка 2015 у Варшаве. Яго арганізатарам зьяўляецца Інстытут Фрэдэрыка Шапэна.
Да ўдзелу ў конкурсе, між іншым, шляхам адбору былі вылучаныя 84 піяністы, але канчаткова ў мерапрыемстве прынялт ўдзел 78 музыкантаў. Сярод іх была таксама беларуская піяністка Юлія Ермалаева, якая аднак ня выйшла ў другі этап конкурсу.
Слуханьні, якія праходзілі ў рамках конкурсу, былі падзеленыя на тры этапы. У фінал, які працягваўся з 18 па 20 кастрычніка, выйшлі 10 піяністаў, у тым ліку адзіны паляк - Шыман Нэрынг.
фота: PAP/Radek Pietruszka, PAP/Paweł Supernak
аз