Парлямэнт зноў атрымаў на разгляд законапраекты, датычныя абортаў

Дэпутаты польскага парлямэнту атрымалі на разгляд два грамадзянскія законапраекты, у якіх вядзецца пра перарываньне цяжарнасьці, але з зусім розных пунктаў гледжаньня. Першы дакумэнт лібэралізуе права на аборты, а другі абвастрае законы, – піша «Dziennik Gazeta Prawna».

Больш верагодна, што права будзе яшчэ менш лібэральнае. Праект закону камітэту #ZatrzymajAborcję (затрымай аборты) падрыхтаваны з мэтаю зьліквідаваць права на перарываньне цяжарнасьці, калі існуе падазрэньне, што плод невылечна хворы або пашкоджаны. Гэтае права, якое ў Польшчы назвалі эўгенічным, выклікае вялікія пратэсты ў грамадзтве. Акрамя таго, многія палітыкі кіруючай партыі выступаюць за тое, каб нельга было выконваць аборты, калі дзіця невылечна хворае.

Летась старшыня партыі «Права й справядлівасьць» Яраслаў Качыньскі казаў, што яго групоўка не адмаўляецца ад забароны абортаў у дадзеным выпадку, але яна намерана правесьці гэта такім чынам, каб не выклікаць пратэстаў. Папярэдняя спроба абвастрэньня закону выклікала рашучы супраціў і «чорныя» пратэсты жанчын.

Гэта чарговая спроба зьмяніць законы, якія датычаць абортаў. Апошнім разам Сэйм адхіліў законапраект, які лібэралізуе права і адправіў на далейшы разгляд у камісіі законапраект камітэту «Стоп абортам», які ўводзіў поўную забарону перарываньня цяжарнасьці, а нават прадбачваў крымінальную адказнасьць для жанчын, якія зрабілі аборт. Парлямэнт адхіліў таксама і гэты праект, але неўзабаве пачаўся збор подпісаў пад чарговым законапраектам, на гэты раз менш радыкальным.

Dziennik Gazeta Prawna/нг