Расея спрабавала настроіць паўсьвету супраць ЗША

БРЫКС — група зь пяці краін: Бразыліі, Расеі, Індыі, Кітая, Паўднёва-Афрыканскай Рэспублікі. Іх лідары сабраліся ў найбуйнейшым горадзе ПАР Яганэсбургу.

У аб’яднаньне БРЫКС уваходзяць дзяржавы, насельніцтва якіх складае амаль палову чалавецтва (42,5%). Цяперашняя сытуацыя, калі ЗША спрачаюцца з Эўрапейскім зьвязам і двума членамі БРЫКС — Кітаем і Расеяй, стварае ўмовы для таго, каб стварыць супрацьвагу Амэрыцы.

На гэта спадзяецца Расея. Яе міністар эканомікі Дзьмітрый Арэшкін прама казаў у Яганэсбургу, што “падчас гандлёвай вайны асабліва важная каардынацыя супольных дзеяньняў”.

Аднак БРЫКС не ў стане стварыць нават супольную лябараторыю прышчэпак. І хаця гэта міжнародная арганізацыя мае свой банк, які разглядаўся як супрацьвага МВФ і мусіў дапамагчы адмовіцца ў разьліках ад даляра, аднак на практыцы БРЫКС не ўплывае на сытуацыю ў сьвеце. Зрэшты, сюды ўжо запрашаюць чарговыя краіны: Аргенціну, Турцыю і Ямайку.

Rzeczpospolita/вк