Кінафільм “Духавенства” прыцягвае натоўпы гледачоў

Кінафільм Войцеха Смажоўскага „Духавенства” („Kler”) выклікае ў Польшчы ажыятаж, правакуе гарачыя дыскусіі ў грамадзтве й палітычныя спрэчкі, а таксама аказвае ўзьдзеяньне на Каталіцкі касьцёл у Польшчы. Прыклады прыводзіць сёньняшняя Gazeta Wyborcza. Фільм расказвае пра рознага віду злоўжываньні ў польскім касьцёле.

У кінатэатры „Helios” ў Бельску-Бяла (поўдзень Польшчы) у сярэдзіне тыдня заля забітая гледачамі. Занялі нават першы рад, які пераважна заўсёды застаецца пустым. Падчас паказу ніхто ня кажа ні слова, поўная цішыня. Калі паказ заканчваецца ня ўсе падымаюцца адразу з крэслаў.

„Пасьля гэтага фільму, хіба што, можна толькі напіцца”, - кажуць журналісту дзьве жанчыны старэйшага ўзросту. Некаторыя адзначаюць, што ахвотна паглядзелі б гэты фільм яшчэ раз, таму што сцэнар густы, важныя рэчы адбываюцца на другім пляне, нельга згубіць ні аднога слова з дыялёгаў.

- З кім я б не гаварыла, усе расказваюць пра падобныя гісторыі да тых, што паказаныя ў кінакарціне. Смажоўскі павінен зрабіць „Духавенства 2”, - адзначае глядачка Яанна.

Самі ксяндзы па-рознаму рэагуюць на фільм. Некаторыя заклікаюць байкатаваць кінакарціну, іншыя дэманструюць больш стрыманую пазыцыю. У адной парафіі ў Сылезіі перад прэм’ерным паказам ксёндз падчас імшы сказаў вернікам, што пробашч у гадзіну божай міласьці будзе ляжаць крыжам у храме за свае грахі і грахі Касьцёла.

У палітыкаў фільм Смажоўскага таксама выклікае разнародныя рэакцыі. Напрыклад, у Асьвенцыме закрылі інтэрнэт-радыёстанцыю за тое, што вядучыя запрашалі насельніцтва паглядзець гэты фільм. У Закапанэ, Элку, Астралэнцы спрабуюць забараніць паказы, але гэта толькі ўзмацняе зацікаўленьне.

Gazeta Wyborcza/яс