Карабель завітаў у 16-ты порт, якім стаў амэрыканскі Сан-Францыска.
Акцыю «Рэйс Незалежнасьці», так называецца заплыў карабля, ладзяць фонд "Сальваці", Міністэрства марской гаспадаркі і рачнога флёту Польшчы, Марскі інстытут у Гдыні й Міністэрства замежных спраў Польшчы. Гэты праект ажыцьцяўляецца, каб распавесьці сьвету пра Польшчу. Дыпляматамі ў гэтай акцыі зьяўляецца моладзь, якая плыве ды вучыцца на караблі «Дар Моладзі».
Рэйс пачаўся ў траўні бягучага году і завершыцца вясной будучага. За гэты час на караблі «Дар Моладзі» пабывае некалькі сотняў маладзёнаў з усяе Польшчы. Гэта пераможцы адмысловага нацыянальнага конкурса - распавядала прэсавая сакратарка Марскога ўнівэрсытэту ў Гдыні доктар навук Агнешка Чарнэцка.
Агнешка Чарнэцка: Для нас самае важнае, каб паказаць Польшчу ў найбольшых гарадах сьвету. У рэйс вырушыла амаль тысяча маладых палякаў. Яны мяняюцца ў розных партах. Гэта пераможцы конкурсу, які зладзіла Міністэрства марской гаспадаркі і рачнога флёту Польшчы ды Марскі ўнівэрсытэт у Гдыні, які зьяўляецца ўладальнікам карабля. Непасрэдна каманда судна – гэта студэнты, якія плывуць на караблі ды прадстаўляюць Польшчу ў сьвеце.
На сваім шляху карабель завітае ў 18 краін сьвету, зойдзе ў 22 парты. Сярод іх такія гарады як Капэнгаген, Бардо, Дакар, Джакарта, Сынгапур, Шанхай, Лос-Анжэлес ды Лёндан. Паўсюль каманда карабля ладзіць адмысловыя акцыі, скіраваныя да мясцовых жыхароў і прадстаўнікоў польскай дыяспары, кажа Агнешка Чарнэцка.
Агнешка Чарнэцка: У кожным порце мы ладзім сумесна з амбасадамі Польшчы сустрэчы з польскай дыяспарай. Нашы студэнты знаёмяць, паказваюць ім карабель, распавядаюць пра Польшчу. Мы раздаём падарункі з Польшчы, альбомы, супольна з дыпляматамі й консульствамі арганізуем двухбаковыя сустрэчы рознага характару: культурніцкага й бізнэсовага.
Цяпер такую сустрэчу каманда карабля ладзіць у Сан-Францыска. Сотні палякаў ды амэрыканцаў з Каліфорніі наведала ўчора карабель «Дар Моладзі», які завітаў у гарадзкі порт. Сан-Францыска стала чарговым этапам на трасе польскага судна вакол сьвету ў гонар 100 гадавіны адраджэньня незалежнасьці Польшчы. Больш падрабязна з Сан-Францыска перадае карэспандэнт Польскага Радыё Марэк Валкускі.
Марэк Валкускі: З 8 раніцы мясцовага часу Дар Моладзі ўвайшоў у затоку Сан-Францыска ды праплыў пад Golden-Gate Bridge. На фоне велізарнага мосту судна выглядала як цацка. Надвор’е не дазволіла распусьціць ветразі. Стаўшы на якар у порце, карабель здамінаваў гавань. Яго бачна нават з пагоркаў у цэнтры горада. Адбылася афіцыйная цырымонія прывітаньня каманды карабля, у якой прыняў удзел ганаровы консул у Сан-Францыска Крыстафэр Кэроўскі. Сабраныя заявілі, што для іх – гэта важны ды гістарычны момант. У гонар каманды консул прычытаў адмыслова напісаны верш, прысьвечаны Польшчы.
Дар Моладзі застанецца ў Сан-Францыска да суботы. На гэтыя дні каманда заплянавала экскурсіі па караблі для жыхароў гораду, сустрэчы з амэрыканскай моладзьдзю, бізнэс-ланч ды канцэрты.
Юры Ліхтаровіч