Logo Polskiego Radia
Print

Кухня: аўсянка на малацэ - пакрокавы ФОТАРЭЦЭПТ

PR dla Zagranicy
Valery Sauko 15.02.2018 19:40
  • кухня.mp3
У якасьці варыянту можна зрабіць аўсянку з натуральным ёгуртам.

Інгрэдыенты: шклянка малака, паўшклянкі буйных аўсяных шматкоў тыпу «Геркулес», 2-3 курагі, разынкі, сушаная журавіна, карыца, апцыянальна мёд і сьметанковае масла.

/

Сухафрукты прамываем у халоднай вадзе, курагу рэжам на дробныя кавалачкі – тое ж самае можна зрабіць з буйнымі разынкамі.

У глыбокую талерку засыпаем шматкі, а таксама вышэйзгаданыя сухафрукты й крышачку карыцы.

/

Награваем у каструльцы малако (тлустасьць па выбару). Як толькі малако закіпіць, здымаем рондаль і заліваем малаком зьмесьціва талеркі.

/

Паводле густу можам дадаць трохі масла. Накрываем посуд іншай талеркай або сподачкам і пакідаем на 10-15 хвілін.

/

Праз 10-15 хвілін наша смачная аўсянка гатовая! Як варыянт можна дадаць мёд. Перамешваем і прыступаем да трапезы!

/

У якасьці варыянту можна зрабіць аўсянку з натуральным ёгуртам. Асноўныя інгрэдыенты такія ж, як і для аўсянкі на малацэ. Аднак замест малака гатуем ваду й кіпенем заліваем аўсяныя шматкі, прыкладна сантымэтар-паўтара над лініяй шматкоў. Накрываем талеркай на 10-15 хвілін.

Аўсянка
Аўсянка з малаком і мёдам

Пасьля гэтага аўсянку перамешваем і падаём зь ёгуртам. Найлепш падаваць асобна: аўсянку ў адной талерцы, а ёгурт – у асобным кубку альбо глыбокай талерцы. У такой сытуацыі нашае сьнеданьне выглядае больш эстэтычна ў параўнаньні з варыянтам, калі б усё перамяшаць. У якасьці альтэрнатывы можна дадаць на шматкі парэзаны банан ды вадкі мёд – альбо ў кубачку, альбо ім паліць нашу кашыцу. Ну, і ядзім у прыкуску – лыжка аўсянкі, банан, лыжка ёгурту.

Атрымліваецца вельмі смачна й сытна.Калі вы баіцеся, што без гатаваньня аўсянка будзе цьвёрдай, то гэта ня так: яна будзе мяккай, пры гэтым захавае больш карысных рэчываў у параўнаньні з клясычным спосабам прыгатаваньня.

Смачна есьці!

Smacznego!

Валеры Саўко

фота аўтара

слухайце далучаны гукавы файл

Print
Copyright © Polskie Radio S.A Пра нас Кантакт